今日已經第十二日，我真係要好好感恩疫情前離開咗我3年嘅姐姐返咗黎幫我手。
Nini係好到我唔係好駛督促住佢做而全部屋企事務打理得頭頭是道。有朋友到來吃飯，整桌的佳餚都可以自己發板。每一位食過佢煮嘢嘅朋友都讚不絕口。家居清潔亦做得非常之好，會自動自覺洗廁所、冷氣、風扇、窗簾，完全唔駛我提同操心。我哋已經當佢係屋企一份子。
佢離開咗香港果段時間，我都有嘗試過去請新姐姐。我諗大家請姐姐嘅經驗，一定無我咁多。我試過姐姐做咗2個月自己走咗（無偷我嘢嘅），但要報警搞一大輪。又試過請咗姐姐，佢話完約想返屋企，但返黎就有咗，最終好來好去佢自己走。又試過姐姐對住我哋柔如綿羊，但對住老人家不理不啋，仲要反轉話老人家蝦佢。最後發現佢欠咗街數，決定大家分手。好彩有以上嘅經驗，發覺都要珍惜上天已經安排咗最好嘅係身邊。
最近天氣開始熱啦，Lunch食完飯，戴住口罩返到公司昏昏欲睡。即刻拎支Idaho Balsam Fir滴2滴落紙巾攝入口罩戴住，立即醒神晒。我好鍾意呢支精油嘅氣味，覺得好香，抖啖氣都舒服d。
佛系媽媽生活誌 Buddist Mama 